16.Urteurrena

Hamaseigarrenean Aidanez

Badator beste urte batez Tolosako Bonberenea Gaztetxearen urteurrena. Dagoeneko agendako ekintza ezberdinetan murgilduak, urtero bezala arlo askotako jarduera ezberdinez jositako egitaraua antolatu dute bertako piromanoek. Horrela, musika (formatu ezberdinetan) izango da protagonista, baina ez dira faltako beste hainbat esparruri eskainitako datak.

Izan ere, aurtengoa ere urte emankorra izan da benetan gaztetxearentzat. Urteroko ekoizpen musikal eta kulturalaz gain, nabarmendu beharra dago legearen aurrean (eta herritarren aurrean) Bonbereneak bereganatutako estatus berria. Izan ere, beste gauza askoren artean 2013. urtea Bonberenea Sutan kanpainari amaiera emateko urtea izan da. San Esteban auzoko eta Tolosako beste hainbat puntutako herritarrez osatutako prozesu parte hartzaile baten erabakia izan da gaztetxea auzoaren zati garrantzitsu dela gaur egun eta izango dela etorkizunean. Hau dela eta ospatu da aurtengo abuztuaren 31ean azken Bonberenea Sutan jaialdia (4. Edizioa), Fermin Muguruzaren “No more tour” biraren azken kontzertua izan dena, Anai Arrebak, Bad Sound System eta Zuloak taldeekin batera.

Askotarikoak izan dira aurten ere garatutako ekintzak. Aipatutako Bonberenea Sutan kontzertuaz gain, ezin ahaztu beste hainbat kontzertu gogoangarrietaz: Bonberenea Txarangak hainbat lagunez inguraturik Laskorain Ikastolan eskainitakoa, Gose taldeak gaztetxeko pabilioiean estreinatutako Bonberenea Sesions ekimen berria… Bestalde, nabarmentzekoa da aurten Bonberenea Ekintzak zigilupean kaleratu diren disko, liburu eta DVD ezberdinen zerrenda: Bonberenea Txarangaren “Etxean Zuzenean” DVDa, Humusen “Saurius diskoa”, Fiachras eta Sumision City Blues taldeen singlea, Sputnik 13 bilduma, Napoka Iriaren “Arnasten ikasteko berriz” diskoa, Glaukomaren “Vol.2”-a, 25th Comming Fire taldearen “No one is here to take your call… leave your message at the tone”… Hala ere, badira aipamen berezia merezi duten bi argitalpen: Hala Bedi irrati librearen 30. urteurrena ospatzeko kaleratu den liburua eta musika bilduma, “Hala Bedi 30 urte Kolpez Kolpe”. Bejondeiela eta jarrai dezatela beste 30 urtez!

Gauzak horrela, martxan da dagoeneko 16. urteurrena ospatzeko egitaraua. Ez dira faltako urteroko kirol txapelketak (abenduaren 14ko Skate Txapelketa, adibidez), ezta kolore eta estilo guztietako kontzertuak: Tokio Sex Destruction (Barcelona), Nueva Vulcano (Bartzelona), The Big Bench (Madrid) Agoraphobia, Rei Kimera, Tuya, Governors, Grises, Malder, Atila y los Unos…

Sorpresak ere izango dira, abenduaren 28an Euskal Herriko talde esanguratsuenetariko batek eskainiko duen kontzertua kasu. Nabarmentzekoa baita ere bertsolaritza “esperimentalari” irekitako tartea, Unai Muñoaren “Ez gara Palestinaz ari” bertso-antzerkiaren emanaldiarekin, abenduaren 14an.

Informazio gehiago lortzeko, nahikoa da Tolosaldean jarritako kartelei begiratzearekin. Bestela, Bonberenearen web orrialdean eta facebook-eko atarian ere aurkitu daitezke urteurrenarekin zerikusia duten detaile guztiak.

Besterik gabe, eskerrikasko eta animatu ekintza hauetan parte hartzera!

Info gehiago:

www.facebook.com/bonberenea.sutan

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.

ACEPTAR
Aviso de cookies