Bonbereneari buruz hitz egin behar bagenuke, Bonberenea da gure etxea. Beste urtebete bete dugu etxe honetan, gurea denean, gurea egin duguna. 21 urte pasa ditugu proiektu honetan lanean etengabe eta aurrera goaz etengabe!

Etxe honek betiko dinamikarekin jarraitzen du, gaur kontzertuak eta bihar ere bai. Inguruan ez dagoen kultur dinamikaren bermatzaile gisara tokia topatu genuen eta asmo horrekin jarraitzen dugu aurrera gurean. Etxeak aldaketa konstanteak pairatzen ditu, belaunaldi berriak gehitzen dira eta gure aldaketen isla paregabea suertatzen da. Aldaketak beti ematen dira eta pareta hauen barruan, aldaketak, zerbait berria esan nahi dute. Aurten, esate baterako, etxeko goiko solairuan eman dira berrikuntza nabarmenenak, eskailera, pasillo eta jangelan hain zuzen ere.

Honetaz gain, kolorez egin behar da kultura eta kolorez pintatzen ditugu gure paretak. Zentzu honetan, urteroko legez, NEOR artista tolosarrak bereak egin ditu berriz. Udazkena negu bilakatzen hasten den unean, eguraldi grisa kolorezko graffity-ez tindatu. Etxeko ikasketa prozesua ere etengabean mantentzen da. Gauza ezberdinak ikasteko aukera dago hemen beti bezala: Musika tresna bat, soinu edo argi teknikari lana, sukaldaritza… ikastaro ezberdinak edonoren eskura.

Etxeko oholtzak sutan jarrai dezan ere lan asko egin da hainbat esparrutan. Hemen gertatzen den guztirako lan zentrala baita eta lan hau guk egiten dugu, maitasun izugarriz. Oholtza honetan, urtero bezala, talde ezberdinak pasa dira: ezagunak, berriak, ez hain ezagunak, betikoak… estilo ezberdinez bustiak zentzumen eta gustu ezberdin guztiei ahal den neurrian, eskaintza aberatsena eskaintzeko. Zifrak esleitzen hasiak, 50 kontzertutik gora egin dira urtearen zehar. Euskal Herriko, Estatuko eta munduko hainbat tokitako jendea izan dugu etxean, Bonberenea estudioak bere lanarekin jarraitu du noski eta aurtengo urtean 7 disko grabatu ditu. Nola ez, Bonberenea Txaranga kaleak alaitzen ibili da beste urtebetez ere.

Bonbereneako tabernan urte askotan ohiko garagardoekin lan egin eta gero, aurten, etxeko garagardoa ekoizteko apostua egin dugu. Gauzak honela, Bonbier garagardoa sortu dugu. Hemendik aurrera, garagardozaleek etxeko garagardoa dastatu ahal izango dute eta motatakoa gainera: Bonbier “Olki” American Pale Ale eta Bonbier “Liztor” Pilsen. Izen hauek etxeko zaindari eta lagunen, gure txakurren omenez aukeratu ditugu.

Bonberenea Irratiak beste urte betez martxan da etxean bertan ekoiztutako musika eskaintzen. Bonberenea Ekintzak da etxe honen zigilua. Autogestionatutako kultura plataforma eta eragilea. Aurten ere, ez gara geldik egon zentzu horretan. 5 dira guztira gehitzen diren erreferentziak: Tooth – Amaierarik ez! (MAXI LP-CD), Jerry A. & 25th Coming Fire – Remains of the remains (LP-CD), Maddi – Ying-Yang(CD), Petti – Bonberenean zuzenean (CD), Guzural – Zhizn Za Zhizn (7”EP).

Amaitzeko, gure posizioa eta lekua etengabe defendatuko dugula argi utzi nahi dugu. 21 urte dira jada hemen gaudela gure lana egiten: kultura indartzen eta eskuragarri bilakatzen, bai publikoarentzako, bai hasten diren taldeentzako. Ulertzen dugu hori dela gure eginbeharra, gure lana eta legitimizatzen gaituen hura. Honegatik, Bonberenea, aurten, bi hamarkadako zamalana gainean harturik, inoiz baino legitimoagoa da.

Besterik gabe, guk hemen jarraituko dugu. Zuk nahi baduzu animatu zaitez parte hartzera!

IZAN PIROMANO ETA ZABALDU SUA!

Informazio gehiagorako:

www.bonberenea.com

www.facebook.com/bonberenea.sutan

www.twitter.com/Bonberenea